Wasiirka arimaha dibadda Itoobiya Seyoum Mesfin oo la filayo inuu dhawaantan soo gaaro magaalada Jowhar

Buluugleey November 15/2005

Saraakiil Itoobiyaan oo uu horkacayo Cabdicasiis Axmed Aadan ahna danjiraha u qaabilsan dowladda Itoobiya arimaha Somaliya ayaa soo gaaray magaalada Jowhar. Wefdigaan oo la dajiyay guri ka soo horjeeda saldhiga booliska Jowhar ayaa wararku sheegayaan in si weyn loo adkeeyey amaanka wadooyinka magaalada soo gala iyo kuwa ka baxo, gaadiidkuna wey xanibnaayeen muda badan.

Saraakiisha Itoobiyaanka ah ayaa shir albaabadu u xiranyihiin la yeeshay wasiirka arimaha dibada ee dowlada KMG  Cabdulaahi sheekh Ismaciil. Shirkaas qarsoodida ah ayaa loo diiday inay wax ka ogaadaan dhamaan saxaafada. Ujeedada weyn ee ka danbeyso booqashada saraakiisha Itoobiyaanka ah ayaa wararku sheegayaan inay tahay soo dhaweynta wasiirka arimaha dibadda Etoobiya Seyoum Mesfin oo ah nin ku heyb ah Meles Zenawi ayaa dhawaantan socdaal ku imaan doono magaalada Jowhar.

Wararka qaar ayaa waxay saadaalinayaan in heshiisyo qarsoodi ah oo dhameystiraya duulimaadka tooska ah ay Itoobiya ku soo qaadi doonto dalka Soomaaliya ayaa lagu kala saxiixan doonaa.

Dadweynaha Soomaaliyeed ayaa caro dheeraad ah ka muujiyey  faragelinta tooska ah iyo degenaansho la’aanta ee Itoobiya ka  abaabuleyso gobolka geeska Afrika.

  


 HOME