Col. Axmed Cumar Jees ayaa ku eedeeyey madaxweynaha & ra’isal wasaaraha inay jebiyeen Axdi qarameedka dowlada FKMG ah

Buluugleey  August 25, 2005

Col. Axmed Cumar Jees oo ka mid ah siyaasiyiinta Soomaaliyeed kuwa ugu  caansan, kana tirsan xildhibaanada baarlamaanka dowlada  KMG ayaa daaha ka qaaday arrimaha ay isku mari la'yihiin xubnaha dowlada ee ku kala sugan Muqdisho iyo Jowhar, taas oo ku timaamay inay tahay in madaxweynaha iyo ra’isal wasaaraha ay jebinayaan Axdi qarameedka dowlada KMG.
“Waxaa la isku haysto waa Xamar ha la yimaado, Xabashina ha la daayo” ayuu yiri Col. Jees. Wuxuu Col.  hadalkiisii raaciyey, "Madaxweynuhu wuxuu go'aansaday inuu maamulka  sidii keligii teliye la hoos geeyo oo uu wax kasta gacanta ku dhigo, iyada oo aan barlamaanka  lagala  tashan,  taasina waa wax khilaafsan Axdi qarameedka.

Xubnaha labada gole dowladda ee ku sugan Muqdisho waxey ku shaqeynayaan buu yiri Col. Jees sida Axdigu  qarameedku qabo, wafaqsanna wixii barlamanku go’aamiyeen.

Col. Jees isagoo ka hadlayey eedeynta ka imaan karta hadii xubnaha Muqdisho ku sugan dadaalkood hakado,ama ay caqabdi ku timaado wuxuu yiri, “Eeda iyagu ma laha oo waxey qabanayaan intii karaankooda ah”.

Wuxuu  kaloo ka hadley keenitaanka Ciidamada shiyeeye oo ay weli ku adkeesanayaa madaxweynaha iyo ra'isal wasaruhu, wuxuuna yiri, "Xalka Soomaaliya dawo uma aha ciidamo shisheeye in loogu hanjabo ee waxey Soomaaliya u baahan tahay  dib u heshiisiin daacad laga wada yahay”.

Soomaaliya dowlad dhexe malaha in ka badan 14 sanadood, taasina waxa ugu wacan umada Soomaaliyeed oo weli la hardameyso fikirka keliyetalisnimada iyo
in xoog wax lagu xalliyo, taasna xal ma aha. Waxaa lagama maarmaan ah in siyaasiyiintu is tusaaleeyaan, oo go'aankoodu ka yimaado wada tashi iyo isku tanaasulid si loo gaaro xal waara.

  

 HOME