Saraakiisha Itoobiya oo la kulmay wasiirada dowlada KMG

Buluugleey, Juun 8, 2005 

Wasiirada kala ah Sheekh Aadan Max’ed Nuur "Sh. Aadan Madoobe" iyo Ibraahim Kiish-buur ayaa shalay soo gaaray magaalada Xudur iyagoo ka soo laabtay deegaanka Ceel-barde oo ay maamusho dowladda Itoobiya. Warkaan oo aan ka soo xiganay bogga Harardheere ayaa sheegaya in toddobaadkii inaga tegay wasiiraradaasi la kulmeen saraakiil Itoobiyaan ah iyagoo isla qaada dhigay sidii ay mar kale magaalada Baydhabo gacantooda ugu soo noqon lahayd. Magaalada Baydhabo oo dowelada KMG loo diiday inay fariisin ka dhigato kadib markii laga saaray gacanta Shaatiguduud iyo Adan Madoobe.

Ilaa intii lagu dhawaaqay dowlada FKMG  ee Soomaaliya waxaa dalka ka aloosan colaado geystay qasaare aad u ballaaran oo naf iyo noolba leh. Dagaaladaas ayaa maalin maalinta ka dambeysa ku sii fidaya gobollada ay horey nabadda uga jirtay. Colaadahan waxay salka ku hayaan qorshe dowlada Itoobiya oo ay weligeedba la damacsaneed umadda Soomaaliyeed, waxaana qorshahaasi gundhig u ah in Soomaaliya degin kana dhalan dowlad u adeegta  danaha shacabkeeda.